مفيش في الإله

مفيش غير الإله قادر يشيل الكَرب والغُمة عشان الحُزن مش بيزول بكُتر الخلق واللمّة دخول الناس في جرحك يوم ماهوش تِرياق عشان الناس سعات بتكون عقارب للجِراح سامة وبينافقوك وبيغشوك وليهُم خمسوميت ذِمة وفيهُم حد كُنت تظنُه غالي وكان في سوق المُخلصين (رِمة) في ليل حُزنك بلاش تعمل لحد حساب بلاش ترمي الحمول عالناس هاترجع ليك هموم وعذاب وعود بالذكرىٰ للماضي تلاقي الكُل كان كداب بـ ذِكر الخلق جرحك يتسع ويزيد بـ ذِكر الله تضُم القلب لو مجروح 200 ضمّة فاقول ...الله #محمدعسل

هِدمة حاف

ياللي إنتوا عايشين في الهَنا ودَفيانين تحت اللّحاف فيه ناس بتتغطىٰ بـ مطر ماشيين بيبكوا بـ هِدمة حاف فيه ناس غلابة وعُمرهم بالظبط. . مَر سنين عِجاف ووحوش بتاكُل لَحمهُم مع إنهُم مَساكين ضِعاف الدنيا ليها قانون غريب إنسان يعيش فوق الحرير مع إنُه أه . .بالظبط. .ديب وفقير بيحلم بالرغيف بيموت جعان... ودا حظُه في نهاية المَطاف👌 #محمدعسل

وصية

لما أموت وتجيبوا سيرتي ماتقولوش كان لينا خَي مش عايزكو تقولوا عني إني كُنت في ليلكو ضَي وإني كنت حبيب وصاحب وإن قلبي مالوهش زَي دي الوصية بتاعتي ليكُم أصل موتي جاي جاي واما تيجوا تحضنوني عند قبري وتزوروني هاتلاقوني ليكو كاتب كنتوا فين وانا لسه حي؟ #محمدعسل

بكل صراحة

عِشت حزين وبكُل صراحة شُفت الغدر ياناس م الكُل كنت أسقيهُم حُب وراحة كانوا يسقوني الخوف والذُل ياما وقعت وقُمت لوحدي من غير أي صديق ولا خِل واتعلمت بإن سكوتي أكبر رد وأجمل حل وإن الدنيا ياناس دوّارة مكسب يجي من بعد خسارة حتى ف قلب طريقي وانا ماشي شمس وحَر وبعدها ضِل. #محمدعسل

فاتح عيني

أنا كنت زمان عايش مرتاح وف وسط الأفراح تلاقيني كان قلبي الطيب مش خايف كان نبضي بيحضُن شراييني دانا كنت بانام زي الأطفال والصُبح البسمة تصحّيني دلوقتي العُمر أهو مَر وفات وخدودي إنجرحت م الدمعات واذا نمت الليل بتكون لحظات وبانامها كمان -فاتح عيني- #محمدعسل

هاتجرحني

هاتجرحني؟ هابان هادي وأقابلَك بابتسام.. عادي وادلّك لو في يوم ضَلّيت وأجيلَك وقت ما تنادي هاتظلمني؟ هاقول مثلاً يَجوز الدنيا جاية عليه وهاقبل عُذرك الكدّاب وابان مبسوط وابان راضي هاتإذيني كمان وكمان ساعتها هاشوف قصادي شيطان لابُد فراقُه في الحاضر لأنُه ماصانش في الماضي هاتطلُب مني أكون جنبك هاسيبك وسط أوهامك ولو حبيت تشوفني فـ يوم تشوفني جوة أحلامك هاجيب لَك حُب بس منين ما كنت معاك وقُدامك رصيد الحُب جوايا -بأفعالك- صَبح فاضي #محمدعسل

قانون الكون

قانون الكون هايبقوا معاك ما دُمت بتِدي وبياخدوا ووقت ماتيجي يوم تحتاج في غمضة عين هايتفَضوا تنادي مهما هاتنادي وتصرُخ م الجِراح عادي هايسمعوا صوتك الموجوع ووالله ما هايردوا #محمدعسل

أصعب شيء

أصعب شيء إنك تجرح قلب بريء وإنك توفي لقلب يسيبَك وانت غريق وإنك تبقىٰ وحيد في الكون شايف حُزنك ألف صديق حتىٰ الدمع ف بحر عنيك رافض ينزل رغم الضيق حتىٰ القلب المحبوس فيك حاسس نبضُه ماشي بطيء أصعب شيء إنك تبقىٰ بتعشق قلب بيعشق تاني وإنك تبقىٰ مِضيع عُمرك وسط أماني وإنك تحلم تفضل تحلم وأما بتصحىٰ -بتحلم تاني- وإنك تبقىٰ مابين أمرين أول واحد عُمر يمُر بقلب حزين عُمره مايعرف حتىٰ الحُب يجيلُه منين أخر واحد تِشرب مُر ينزل دمع علىٰ الخدين. #محمدعسل

لمتابعة الشاعر محمد عسل

يرجى الاشتراك في القناة وتفعيل الجرس👇 https://www.youtube.com/channel/UCSHF8rwTxaKDxqxM83Xj1zg?sub_confirmation=1 صفحة الشاعر محمد عسل (الرسمية) على الفيس بوك 👇 https://m.facebook.com/Poetrywritermohammedasl/ الحساب الشخصي 👇 https://www.facebook.com/Mohammedasl.50 حساب الانستجرام https://instagram.com/poet_mohammed_asl Follow Mohammed Asl on: the official Facebook page: https://m.facebook.com/Poetrywritermohammedasl/ On Instagram: https://instagram.com/poet_mohammed_asl #محمدعسل #الشاعرمحمدعسل

كوم مشاعر

أنا قلبي  موجوع بالقوي

أنا حٙد جوة الحُزن عايش فَهلوي

والدنيا دي زي الملاهي يابشر

وانا قلبي فيها لوحدُه قاعد مُنطوي

ولا ليا حد يكون حبيب 

ولا ليا قلب عشان لو أحزن ينكوي

أنا مين ياناس؟ 

أنا كوم مشاعر بس زمني عليا داس

أنا حد عارف م الاساس 

إني هاكون في الدنيا دي زي الورق

وف يوم كلامي هايتمِحي أو يتحَرق  

أو وسط بحر هايترمي

ومادام أنا معرفش اعوم، فأكيد مَصيري يكون غرق

أنا حد رافض إنُه يسمع كلمه واحدة منكُم

أنا حد عاضض كل إيدُه عشان يداري جرحكُم

أنا حد كارِه من إيديكوا الطبطبة

علشان ديابة خلاص وبان لي وشكُم

وخلاص رٙح أعمل إني واحد لسه حي

مع إني ميت من زمان ..من غدركُم. 

#محمدعسل